لاہور: پاکستان میں ذہانت اور ٹیلنٹ کی کوئی کمی نہیں،اس کی نئی مثال سامنے آگئی، 9 سالہ پاکستانی طالبہ نے کیمیا دوری جدول( کیمیسٹری کے پیریوڈک ٹیبل) کو کم مدت میں مرتب کرکے بھارتی پروفیسر کو مات دیدی۔
لاہور کی نو برس کی ہونہار پاکستانی طالبہ نتالیہ نجم نے کیمیا کے دوری جدول (پیریاڈک ٹیبل) میں عناصر کو درست ترتیب میں رکھنے کا عالمی ریکارڈ توڑ دیا۔
گلف نیوز کے مطابق 18 جولائی کو لاہور کی نتالیہ نجم نے گنیز بک آف ورلڈ ریکارڈ اپنے نام کیا۔ نتالیہ نجم نے صرف دو منٹ 42 سیکنڈ میں پیریاڈک ٹیبل کے عناصر کو برق رفتاری سے اپنی جگہ پر رکھ کر کم ترین مدت میں ان کو ترتیب کے ساتھ پیش کیا۔
نتالیہ نے بھارتی پروفیسر میناکشی اگروال کا ریکارڈ سات سیکنڈ کے فرق سے توڑا ہے اور اس کارنامے کو انجام دینے کے بعد انہوں نے خوشی سے نعرہ لگایا اور ایک ویڈیو میں گنیز بک آف ورلڈریکارڈ کے ججوں نے ان کو سراہا۔
طالبہ نتالیہ سائنس اینڈ ٹیکنالوجی میں غیرمعمولی دلچسپی رکھتی ہیں اور وہ چاہتی ہیں کہ دنیا کے دیگر بچے بھی ان کے کام سے متاثر ہوکر سائنس، ٹیکنالوجی، انجینئرنگ اور ریاضی (ایس ٹی ای ایم) کی جانب راغب ہوں گے۔ جوں ہی پاکستانی سوشل میڈیا میں نتالیہ کی ویڈیو اور پوسٹ سامنے آئیں تو فیس بک صارفین نے انہیں بہت سراہا۔
کئی افراد نے انہیں پاکستان کی انتہائی کم عمرسائنس دان کا نام بھی دیا۔
نتالیہ چاہتی ہیں کہ بالخصوص لڑکیاں اس شعبے کو انتخاب کریں تاکہ زیادہ سے زیادہ بچیاں سائنس کی جانب راغب ہوسکیں۔
دلچسپ بات یہ ہے کہ نتالیہ کے والد حسن نجم نے کہا ہے کہ اب تک نتالیہ کو کسی اسکول میں داخل نہیں کرایا گیا اور انہیں گھر پر ہی تعلیم دی جارہی ہے۔
