استنبول: یورپ میں مقیم پاکستانیوں کیلئے خوشخبری، ان کیلئے پاکستان کے سستے سفر کا راستہ کھل گیا ہے، ایک ائر لائن جو سستی بھی ہے، انہیں سفری سہولت فراہم کرنے کیلئے میدان میں آگئی ہے، جس سے فضائی کمپنیوں میں مقابلہ بڑھے گا، اور دوسری ائر لائنز کو بھی کرائے کم کرنے پڑیں گے۔
تفصیلات کے مطابق پاکستان میں کرونا کی صورتحال قابو میں آنے اور سیکورٹی بہتر ہونے کے بعد ترکی کی نجی ائر لائن ’’پیگاسس‘‘ نے پاکستان کے لئے پروازیں چلانے کا اعلان کردیا ہے، ائرلائن نے پہلے مرحلے میں استبول اور کراچی کے درمیان 25 ستمبر سے پروازیں شروع کردی ہیں، استنبول سے یورپی ممالک کے لئے کنکٹڈ فلائٹس فراہم کی جائیں گی، کراچی سے ہر پیر، بدھ اور جمعہ کو رات 8 بج کر 35 منٹ پر پروازروانہ ہوا کرے گی، جبکہ استنبول سے پیر، منگل اور جمعرات کو کراچی کے لئے پرواز ہوگی۔
کن یورپی شہروں کیلئے پروازیں
ترکی کی نجی ائر لائن ’’پیگاسس‘‘ کراچی سے براستہ استبول جن یورپی شہروں کے لئے مسافر اٹھائے گی، ان میں اٹلی میں میلان اور روم، اسپین میں بارسلونا اور میڈرڈ، فرانس میں پیرس سمیت دیگر شہروں، جرمنی میں فرینکفرٹ، برلن، کولون، برطانیہ میں لندن اور مانچسٹر، سوئٹزرلینڈ میں جنیوا اور زیورخ، ڈنمارک میں کوپن ہیگن، ہالینڈ میں ایمسٹرڈیم، ہیمبرگ، سویڈن میں اسٹاک ہوم، آسٹریا میں ویانا، جبکہ دیگر یورپی شہروں میں پراگ، مارسیلی، ڈیسلڈورف، برسلز، بخارسٹ شامل ہیں جبکہ روس کے دارالحکومت ماسکو کے لئے کراچی سے براستہ استنبول سفر کی سہولت فراہم کی جائے گی۔
کرایہ کتنا ہوگا
ائر لائن نے کراچی استبول کا دو طرفہ کرایہ کم ازکم 40 ہزار پاکستانی روپے سے شروع کیا ہے، اور اٹلی کیلئے دو طرفہ کرایہ 60 ہزار ہوگا، اسی طرح دیگر یورپی ممالک کیلئے کنکٹڈ یورپی فلائٹس کے کرائے بھی کم ہوں گے، دوسری طرف نئی ائرلائن میدان میں آنے سے یورپی ممالک کے لئے پاکستان سے کنکٹڈ فلائٹس فراہم کرنے والی دیگرائرلائنز کے لئے مسابقت کی فضا پیدا ہوگی اور ان کے کرائے بھی کم ہونے کی توقع ہے۔
