گجرات، جہلم اور گجرخان والوں کیلئے خوشخبری، اب انہیں بھی ملے گا آرام دہ سفر

جہلم: پنجاب کے ضلع گجرات، جہلم اور گجر خان والے بھی ہوجائیں خوش، اب انہیں بھی ملے گا موٹروے کا آرام دہ سفر، جی ہاں وزیراعظم عمران خان نے کھاریاں سے راولپنڈی تک جی ٹی روڈ کے سیکشن کو موٹروے میں بدلنے کی اصولی منظوری دے دی ہے، اور اس حوالے سے نیشنل ہائی وے اتھارٹی جلد کام شروع کردے گی۔

تفصیلات کے مطابق منصوبہ پبلک پرائیوٹ پارٹنر شپ کے تحت تعمیر کئے جانے کا امکان ہے، کھاریاں سے راولپنڈی تک جی ٹی روڈ کے اس حصے کو موٹر وے میں بدلنے کے لئے اس میں ایک لائن کا اضافہ کیا جائے گا، جبکہ راستے میں آنے والے شہروں میں بائی پاس دئیے جائیں گے۔

اس منصوبے سے نہ صرف ان 3 اضلاع کے لوگوں کے لئے راولپنڈی کا سفر سمٹ جائے گا، بلکہ جی ٹی روڈ کے ذریعہ لاہور سے راولپنڈی کی مسافت میں بھی ایک گھنٹہ تک کمی ہوجائے گی۔

سرکاری ذرائع کے مطابق اس منصوبے کو بعد ازاں سیالکوٹ موٹر وے سے بھی جوڑ دیا جائے گا، جبکہ اس بات کا بھی امکان ہے کہ پہلے مرحلے میں ہی اسے سیالکوٹ موٹروے تک توسیع دے دی جائے۔

اگر اسے سیالکوٹ سے جوڑ دیا تو س صورت میں لالہ موسیٰ، گجرات اور وزیرآباد کے عوام کو بھی موٹروے کی سہولت مل جائے گی، جبکہ سیالکوٹ، لاہور اور اسلام آباد ائیر پورٹ جانے والوں کو بھی آرام دہ سفر میسر آجائے گا۔

اس حوالے سے وفاقی وزیر سائنس و ٹیکنالوجی فواد چوہدری نے بھی تصدیق کی ہے کہ وزیراعظم نے جی ٹی روڈ کے اس حصے کو موٹر وے میں بدلنے کی منظوری دےدی ہے ۔

“عوامی مطالبے پر وزیر اعظم پاکستان عمران خان نے کھاریاں سے راولپنڈی تک موٹر وے بنانے کی منظوری دے دی ہے۔جس سے علاقے کی معیشت میں بہتری آۓ گی”
ضلع جہلم کی تحصیل پنڈ دادنخان میں پاسپورٹ آفس کے افتتاح کے موقع پر
وفاقی وزیر فواد چوہدری نے ایک اور خوشخبری سنا دی@fawadchaudhry pic.twitter.com/tbIuxWefB8

— ‏SYᗴᗞ-ᗷᑌKᕼᗩRI (@LalBukhari) June 20, 2020